خُسروی اچھی لگی نہ سروری اچھی لگی
ہم فقیروں کو مدینے کی گلی اچھی لگی
دور تھے تو زندگی بے رنگ تھی بے کیف تھی
اُن کے کوچے میں گئے تو زندگی اچھی لگی
میں نہ جاؤں گا کہیں بھی در نبیﷺکا چھوڑ کر
مُجھ کو کوئے مصطفیٰﷺکی چاکری اچھی لگی
یوں تو کہنے کو گُزاری زندگی میں نے مگر
جو درِ آقا پہ گُزاری وہ گھڑی اچھی لگی
والہانہ ہو گئے جوتیرے قدموں پَر نثار
حق تعالیٰ کو ادا ان کی بڑی اچھی لگی
ناز کر تو اے حلیمہؓ سرورِ کونین پَر
گر لگی اچھی تو تیری جھونپڑی اچھی لگی
رکھ دیا سرکار کے قدموں میں سلطانوں نے سر
سرورِ کون و مکاں کی سادگی اچھی لگی
آج محفل میں نیازؔی نعت جو میں نے پڑھی
عاشقانِ مصطفیٰ ﷺکو وہ بڑی اچھی لگی