شان رب نے حضورؐ دی ودھائی ہوئی اے
اساں پریت حضور نال لائی ہوئی اے

اپنے دِلاں نوں اسی شاد کَری اے
گھر گھر آقاؐ دا میلاد کَری اے

موج عاشقاں دی آقاؐ نے لوَائی ہوئی اے
اساں پریت حضورؐ نال لائی ہوئی اے

بیٹھے نے دیوانے سرکارؐ واسطے
آساں ساڈے دل وِچ دیدار واسطے

اساں دل والی سیج سجائی ہوئی اے
اساں پریت حضورؐ نال لائی ہوئی اے

دُکھاں دے ہنھیرے سب دور کر دوو
جلوہ وِکھا کے نور و نور کر دوو

شمع عِشق والی عاشقاں جلائی ہوئی اے
اساں پریت حضورؐ نال لائی ہوئی اے

بَدَل جِتھے رحمتاں دے چھائے ہوئے نے
عاشقاں نے جِتھے ڈیرے لائے ہوئے نے

جِتھے نگری حضورؐ نے وسائی ہوئی اے
اساں پریت حضورؐ نال لائی ہوئی اے

رحمتاں دا میرے اُتے میہنہ وَریا
پَلا جَدوں آلِ نبیؐ دا پھڑیا

گُڈی اودوں دی سائیاںؐ نے چڑھائی ہوئی اے
اساں پریت حضورؐ نال لائی ہوئی اے

حوراں جتھے ہر ویلے اؤٓن بیلیا
اوتھوں دیاں ریساں کرے کون بیلیا

ساری دُنیا توں وکھری کمائی ہوئی اے
اساں پریت حضورؐ نال لائی ہوئی اے

ضؔیاء میری ذات تے اوقات کوئی نئیں
میرے وِچ فن والی بات کوئی نہیں

عالی شہنشاہؐ نے بات بنائی ہوئی اے
اساں پریت حضورؐ نال لائی ہوئی اے